Train journey satire story Malayalam

 സീസണ്‍ ടിക്കറ്റ്

ബിജുക്കുട്ടൻ ജോലി കഴിഞ്ഞ് ട്രെയിനിൽ മടങ്ങുന്ന സമയം.

യാത്രക്കിടയിൽ സ്ഥിരം കലപില സംസാരിക്കുന്ന ടീച്ചർമാരുടെ ഒരു സംഘമുണ്ട്. ലോകത്തുള്ള സകലമാന വിഷയങ്ങളേക്കുറിച്ചും തലനാരിഴ കീറി വിശദമായി പഠിച്ച് വാദങ്ങൾ ഉന്നയിച്ച് ബുദ്ധിജീവി ചമയുകയാണ് അവരുടെ പ്രധാന മൽസരം. അല്ലെങ്കിലും പത്രമാധ്യമങ്ങളിൽ ഓരോ ദിവസവും വിഷയങ്ങൾക്കു പഞ്ഞം വരാത്ത രീതിയിൽ വിത്തുപാകാൻ രാപകൽ ജോലിക്കാരുണ്ടല്ലോ. ഇവര്‍ ഒരു നിമിഷം പോലും വായടച്ചു വക്കില്ല. അതുകൊണ്ട് കഴിവതും അവരുടെ അടുത്തുനിന്നും മാറി ഇരിക്കാന്‍ അയാള്‍ നോക്കാറുണ്ട്.

ഒരു ദിവസം- വൈകുന്നേരം ട്രെയിനിൽ ഒരു സാമൂഹിക അനീതിയേക്കുറിച്ച് വാദങ്ങളും പ്രതിവാദങ്ങളും ഉന്നയിച്ച് അധ്യാപികമാർ മുന്നേറുകയായിരുന്നു. അതിനൊപ്പം എതിർ സീറ്റിലിരുന്ന ബിജുക്കുട്ടൻ ഉൾപ്പെടെ മറ്റുള്ള സഹയാത്രികർക്കു ഈ വക തള്ളുകൾ അസഹ്യമായി അനുഭവപ്പെട്ടു.

അപ്പോഴാണ്, ടി.ടി. വന്നത്-

"ആ ടിക്കറ്റ് ഒന്നു കാണിക്ക്"

എല്ലാവരും പഴ്സും ബാഗും തുറന്ന് ടിക്കറ്റ് കാണിച്ചു തിരികെ വാങ്ങിക്കഴിഞ്ഞു.
ഒരു ടീച്ചർ 'ഞാനൊന്നുമറിഞ്ഞില്ലേ' എന്ന മട്ടിൽ ജനാലയിലൂടെ വെളിയിലേക്കു നോക്കിയിരിക്കുന്നുണ്ട്. ആകാശത്ത്, പട്ടാപ്പകൽ കണികാണാന്‍ കിട്ടാത്ത നക്ഷത്രമെണ്ണാൻ ശ്രമിക്കുകയാണ്!

അപ്പോൾ അടുത്തിരുന്ന മറ്റൊരു ടീച്ചർ തോളത്തുതട്ടി പറഞ്ഞു -

"ടീച്ചറേ, ടിക്കറ്റ് "

മനസ്സില്ലാ മനസ്സോടെ ഹാൻഡ് ബാഗിൽ നിന്ന് ടിക്കറ്റ് എടുത്തു കൊടുത്തു.
അപ്പോൾ ടി.ടി. പറഞ്ഞു -

"ഇത് എക്സ്പെയ്ഡ് ആയി രണ്ടാഴ്ച കഴിഞ്ഞല്ലോ''

ടീച്ചർ കൂളായി പറഞ്ഞു -

"ഞാൻ നോക്കാൻ മറന്നു "

"ഓ.കെ. ശരി, 350 രൂപ അടയ്ക്കണം. ക്യാഷാണോ പേറ്റിഎം ആണോ?''

ടീച്ചർ- "ഞാൻ കഴിഞ്ഞ പത്തു വർഷമായിട്ട് സീസണിൽ പോകുന്നതാണ്. ആദ്യമായിട്ടാണ് ഇങ്ങനെ സംഭവിക്കുന്നത്. മനപ്പൂർവ്വമല്ല "

അപ്പോൾ മറ്റൊരു സഹപ്രവർത്തക സഹായിച്ചു പരത്താനെത്തി-

"ടീച്ചറെ, എന്താ സ്റ്റുഡൻസിന്റെ പേപ്പർ വാല്വേഷൻ കഴിഞ്ഞപ്പോ എല്ലാം മറന്നു പോയോ "

അവരുടെ ലക്‌ഷ്യം ഫലിച്ചു.

അപ്പോൾ ടി.ടി. പറഞ്ഞു-

"ആഹാ...ടീച്ചർമാരാണോ ഇങ്ങനെ തുടങ്ങുന്നത്. എന്തായാലും 150 രൂപ ഇപ്പോൾ അടച്ചേക്ക് "

ആ സ്ത്രീ വളരെ പതുക്കെ രൂപ കൊടുത്ത് രസീതു വാങ്ങി.
എന്തായാലും പിന്നെ, ആ യാത്രയിൽ കലപില സംസാരങ്ങളൊന്നും ഉണ്ടായില്ല!

ടീച്ചർ, രൂപ നഷ്ടമായതിനാലും മറ്റുള്ളവരുടെ മുന്നിൽ ചമ്മിയതിനാലും പിന്നീട് മൗനവ്രതത്തിലേക്ക് ഊളിയിട്ടു. അതിനാല്‍, ബിജുക്കുട്ടനു വലിയ ആശ്വാസമായി.

ആശയം - train personal experience satire story, online reading in Malayalam. season ticket, TTE, train ticket examiner, India, Kerala.

സമകാലിക വിഷയങ്ങളേക്കുറിച്ചും സാമൂഹിക വ്യവസ്ഥിതിയേപ്പറ്റിയും വാചകമടിക്കാൻ എല്ലാവർക്കും വലിയ മിടുക്കാണ്. എന്നാൽ, സ്വന്തം മേഖലയിൽ ഒരാൾക്കു ചെയ്യാൻ ആവശ്യമായ ക്രമക്കേടുകളും കൊച്ചു കൊച്ചു തട്ടിപ്പുകളും സ്വയം കണ്ണടച്ചു വിഴുങ്ങിയിട്ട് വലിയ അഴിമതി കാട്ടാൻ ശേഷിയുള്ളവരെ
നാവിനാൽ കടന്നാക്രമിക്കുകയാണ്.

ആദ്യം സ്വന്തം കർമ്മമണ്ഡലത്തിലെ തെറ്റുകുറ്റങ്ങൾ തിരുത്തിത്തുടങ്ങുക. കാരണം, ഈ ലോകത്തെ വലിയ അഴിമതികളും പീഡനങ്ങളും കൊള്ളയും തടയാൻ നമുക്കാവില്ല. എന്നാൽ, തടയാൻ പറ്റുന്നത് സ്വയമങ്ങ് നന്നാവുകയെന്നതായിരിക്കും.